ട്രേഡ്‌ ഫെസിലിറ്റേഷന്‍ സെന്ററിനായി ഐ.സി.ഐ.സി.ഐ. ബാങ്കും ആലിബാബ ഡോട്ട്‌കോമും സഹകരിക്കും

കൊച്ചി : രാജ്യത്തെ ചെറുകിട ഇടത്തരം സംരംഭകര്‍ക്ക്‌ ലളിതമായി സാമ്പത്തിക സഹായം ലഭ്യമാക്കാനുള്ള ഏകജാലക ട്രേഡ്‌ ഫെസിലിറ്റേഷന്‍ സെന്റര്‍ സ്ഥാപിക്കാനായി ഇന്ത്യയിലെ ഏറ്റവും വലിയ സ്വകാര്യ മേഖലാ ബാങ്കായ ഐ.സി.ഐ.സി.ഐ. ബാങ്കും ആലിബാബ ഡോട്ട്‌കോമും സഹകരിക്കും. ആലിബാബ ഡോട്ട്‌കോമില്‍ അംഗങ്ങളായ ഇന്ത്യന്‍ സംരംഭകര്‍ക്ക്‌ ഐ.സി.ഐ.സി.ഐ. ബാങ്കിന്റെ ബിസിനസ്‌ ലോണുകള്‍ അടക്കമുള്ള ഏതു ബിസിനസ്‌ സേവനവും അതിവേഗത്തില്‍ ലഭിക്കാന്‍ ഇതു സഹായിക്കും. കാഷ്‌ മാനേജുമെന്റ്‌ സേവനം, വിദേശ നാണ്യ വിനിമയം, ബാങ്ക്‌ ഗാരണ്ടികള്‍, അതിര്‍ത്തിക്കപ്പുറത്തേക്കുള്ള പണമടക്കലുകള്‍ തുടങ്ങിയവയിലും ഇത്തരം സഹായങ്ങള്‍ ലഭിക്കും. മറ്റ്‌ ആനുകൂല്യങ്ങളും ഇളവുകളും ഇതോടൊപ്പമുണ്ടാകും. 

ഓണ്‍ലൈന്‍ ട്രേഡ്‌ ഫെസിലിറ്റേന്‍ സെന്ററിനായി ആലിബാബ ഡോട്ട്‌കോമുമായി സഹകരിക്കുന്ന ഇന്ത്യയിലെ ആദ്യ ബാങ്കാകാനായതില്‍ തങ്ങള്‍ക്കേറെ ആഹ്ലാദമുണ്ടെന്ന്‌ ഐ.സി.ഐ.സി.ഐ. ബാങ്ക്‌ എക്‌സിക്യൂട്ടീവ്‌ ഡയറക്‌ടര്‍ രാജീവ്‌ സഭര്‍വാള്‍ പറഞ്ഞു. ഓണ്‍ലൈനായി പുതിയ നിരവധി നീക്കങ്ങള്‍ക്കാണ്‌ ബാങ്ക്‌ തുടക്കം കുറിക്കുന്നത്‌. ലളിതമായ ബാങ്കിങ്‌ പരിഹാരങ്ങള്‍ നല്‍കാനുള്ള തങ്ങളുടെ പ്രതിബദ്ധത തന്നെയാണ്‌ ഇവടേയും ദൃശ്യമാകുന്നതെന്ന്‌ അദ്ദേഹം പറഞ്ഞു. അതിവേഗത്തിലുള്ള സംയോജിത സേവനങ്ങള്‍ ലഭ്യമാകുന്നത്‌ ഇന്ത്യന്‍ സംരംഭകരെ ആഗോള തലത്തില്‍ മുന്നേറാന്‍ സഹായിക്കുമെന്നും അദ്ദേഹം ചൂണ്ടിക്കാട്ടി. ആലിബാബ ഡോട്ട്‌കോമിന്റെ അംഗങ്ങള്‍ക്ക്‌ ഏറ്റവും മികച്ച നിരക്കുകളും ഇളവുകളും ലഭിക്കാന്‍ ഇതു സഹായിക്കുമെന്ന്‌ ആലിബാബ ചാനല്‍സ്‌ ഡയറക്‌ടര്‍ ഭൂഷണ്‍ പാട്ടില്‍ പറഞ്ഞു. 

സ്‌പൈസി ചിക്കന്‍ മോമോസും ചിക്കന്‍ റിങ്‌സുമായി ഫൈവ്‌ സ്റ്റാര്‍ ചിക്കന്‍

കൊച്ചി : സ്‌പൈസി ചിക്കന്‍ മോമോസ്‌, ചിക്കന്‍ റിങ്‌സ്‌ എന്നിവയുമായി രുചിമുകുളങ്ങള്‍ക്ക്‌ ഉത്തജനം പകരാന്‍ ഫൈവ്‌ സ്റ്റാര്‍ ചിക്കന്‍. ഭൂട്ടാന്‍, സിക്കിം, നേപ്പാള്‍, ചൈന എന്നിവിടങ്ങളില്‍ ഏറ്റവും ജനകീയമായ തെരുവോരഭക്ഷണമാണ്‌ ചിക്കന്‍ മോമോസ്‌. ചിക്കന്റെ കുഞ്ഞു കഷണങ്ങളും സുഗന്ധവ്യഞ്‌ജനങ്ങളും മിശ്രണം ചെയ്‌ത്‌, പൊരിച്ച്‌, എരിവും സുഗന്ധവുമുള്ള സോസിനൊപ്പം നല്‍കുന്നതാണിവ.

ഏറ്റവും ഉന്നതനിലവാരത്തിലുള്ള കോഴിയിറച്ചിയും സ്വാഭാവിക ചേരുവകളും ചേര്‍ത്താണ്‌ ഫൈവ്‌ സ്റ്റാര്‍ ചിക്കന്‍ പ്രൊഫഷണലുകളുടെ മേല്‍നോട്ടത്തില്‍ ഇവ തയാറാക്കുക. സോസില്‍ മുക്കി നേരിട്ട്‌ കഴിക്കുകയാണ്‌ ഈ മോമോസിന്റെ സ്വാദ്‌ ആസ്വദിക്കാനുള്ള ഏറ്റവും ഉചിതമായ മാര്‍ഗം.

നിങ്ങളുടെ ഭക്ഷണം ആസ്വാദ്യവും രസകരവുമാക്കുകയാണ്‌ റിങ്‌ രൂപത്തിലുള്ള ചിക്കന്‍ വിഭവം. ഉത്തമമായ ചിക്കന്‍ തിഞ്ഞെടുത്ത്‌ ഏറ്റവും മികച്ച ഉല്‍പ്പന്നങ്ങള്‍ മിശ്രണം ചെയ്‌താണ്‌ ഇവ തയാറാക്കുക. പുതുമയും മൊരുമൊരുപ്പും ചിക്കന്‍ റിങ്‌സിനെ ഉപഭോക്താക്കള്‍ക്ക്‌ പ്രിയങ്കരമാക്കും.

മൊരുമൊരുപ്പും സത്ത്‌ നിറഞ്ഞതുമായ ഈ ചിക്കന്‍ ഉപഭോക്താക്കള്‍ക്ക്‌ ലഭിക്കുന്നത്‌ പീസൊന്നിന്‌ 39 രൂപ നിരക്കിലാണ്‌. ദക്ഷിണേന്ത്യയിലെ എല്ലാ ഫൈവ്‌ സ്റ്റാര്‍ ഔട്ട്‌ലെറ്റുകളിലും ഇവ ലഭിക്കും.

ബ്രിട്ടനില്‍ കുടിയേറ്റ നിയമം കര്‍ശനമാക്കുന്നു, നഴ്‌സുമാര്‍ ആശങ്കയില്‍

ലണ്ടന്‍

കുടിയേറ്റനിയമം കര്‍ശനമാക്കാന്‍ പോകുന്ന ബ്രിട്ടനില്‍ നിന്ന്‌ ഇന്ത്യയുള്‍പ്പെടെയുള്ള യൂറോപ്പിതര രാജ്യങ്ങളില്‍നിന്നുള്ള 30,000 നഴ്‌സുമാര്‍ നാട്ടിലേക്ക്‌ മടങ്ങേണ്ടിവരും. സര്‍ക്കാര്‍ തലത്തിലുള്ള ആരോഗ്യകേന്ദ്രങ്ങളില്‍ ജോലിചെയ്യുന്ന നഴ്‌സുമാര്‍ക്കാണ്‌ ഇതു ബാധകമാകുക. ജോലിയില്‍ പ്രവേശിച്ച്‌ ആറു വര്‍ഷത്തിനുശേഷവും 35,000 പൗണ്ട്‌(35.2 ലക്ഷം രൂപ) വാര്‍ഷിക ശമ്പളമില്ലാത്ത യൂറോപ്പിതര രാജ്യങ്ങളില്‍നിന്നുള്ള നഴ്‌സുമാര്‍ക്കാണ്‌ മടങ്ങേണ്ടി വരിക. 2011ല്‍ ഈ നിയമം നിലവില്‍ വന്നു. ആറുവര്‍ഷം തികയുന്ന 2017ല്‍ ഈ മാനദണ്ഡം പാലിക്കാന്‍ കഴിയാത്തവര്‍ക്ക്‌ തിരികെപോകേണ്ടി വരും. 

ബ്രിട്ടനില്‍ നഴ്‌സുമാര്‍ക്ക്‌ ലഭിക്കുന്ന ശരാശരി ശമ്പളം 21,000 മുതല്‍ 28,000 പൗണ്ട്‌ വരെ മാത്രമാണ്‌. യൂറോപ്പിതര രാജ്യങ്ങളില്‍നിന്നുള്ള 90 ശതമാനം നഴ്‌സുമാര്‍ക്കും ആറു വര്‍ഷം കൊണ്ട്‌ 35,000 പൗണ്ട്‌ വാര്‍ഷിക ശമ്പളം ഉണ്ടാവില്ലെന്നാണ്‌ കണക്കാക്കുന്നത്‌.

ബ്രിട്ടനിലേക്ക്‌ നഴ്‌സുമാരെ അയയ്‌ക്കുന്ന രണ്ടാമത്തെ പ്രധാന രാജ്യമാണ്‌ ഇന്ത്യ. ഇതില്‍ നല്ലൊരു പങ്ക്‌ മലയാളികളുമുണ്ട്‌. ഫിലിപ്പീന്‍സാണ്‌ ഒന്നാമത്‌. രാജ്യത്ത്‌ വിദേശ നഴ്‌സുമാരുടെ എണ്ണം വന്‍തോതില്‍ കുറയ്‌ക്കാന്‍ നിയമത്തിലൂടെ കഴിയുമെന്ന്‌ സര്‍ക്കാര്‍ കരുതുന്നു

പീഡന ശ്രമം അമ്മാവനും അയല്‍വാസിയും അറസ്റ്റില്‍

കൊച്ചി: 12 വയസ്‌ മാത്രം പ്രായമുള്ള പെണ്‍കുട്ടിയെ ലൈംഗികമായി പീഡിപ്പിക്കാന്‍ ശ്രമിച്ച പെണ്‍കുട്ടിയുടെ അമ്മാവനെയും അയല്‍വാസിയെയും വരാപ്പുഴ പൊലീസ്‌ അറസ്റ്റ്‌ ചെയ്‌തു. പെണ്‍കുട്ടിയുടെ അമ്മാവന്‍ തൃശൂര്‍ പാമ്പാന്‍തോട്‌ പൂഴിത്തറ വീട്ടില്‍ മണികണ്‌ഠന്‍ (38), അയല്‍വാസി കടമക്കുടി ചോതിചരിയന്‍ തുരുത്ത്‌ കുഞ്ഞുമോന്‍ എന്ന്‌ വിളിക്കുന്ന ഉദയന്‍ (48) എന്നിവരെയാണ്‌ അറസ്റ്റ്‌ ചെയ്‌തത്‌. ജനുവരിയില്‍ പെണ്‍കുട്ടിയുടെ അമ്മ വീടായ പെരുമ്പിള്ളിശേരി ചരിയംതുരുത്തില്‍ വച്ചായിരുന്നു ആദ്യ പീഡന ശ്രമം. ഈ മാസം എട്ടിന്‌ വീണ്ടും പീഡന ശ്രമമുണ്ടായതോടെ പെണ്‍കുട്ടിയുടെ വീട്ടുകാര്‍ പൊലീസില്‍ പരാതി നല്‍കുകായിരുന്നു. 

പറവൂര്‍ സി.ഐ എസ്‌.ജയകൃഷ്‌ണന്റെ നിര്‍ദ്ദേശാനുസരം വരാപ്പുഴ സബ്‌ ഇന്‍സ്‌പെക്‌ടര്‍ കെ.എ മുഹമ്മദ്‌ നിസാര്‍, എ.എസ്‌.ഐ സുധീര്‍, പത്മകുമാര്‍, മനോജ്‌, ബിജു കെ.എ എന്നിവര്‍ ചേര്‍ന്നാണ്‌ പ്രതികളെ പിടികൂടിയത്‌. നോര്‍ത്ത്‌ പറവൂര്‍ ജുഡീഷ്യല്‍ ഫസ്റ്റ്‌ ക്ലാസ്‌ മജിസ്‌ട്രേറ്റ്‌ കോടതിയില്‍ ഹാജരാക്കിയ പ്രതികളെ 14 ദിവസത്തേക്ക്‌ റിമാന്‍ഡ്‌ ചെയ്‌തു.

വിദേശ മലയാളികളുടെ നിക്ഷേപം ഒരു ലക്ഷം കോടി കവിഞ്ഞു

കൊച്ചി: കേരളത്തിലെ ബാങ്കുകളിലുള്ള വിദേശ മലയാളികളുടെ നിക്ഷേപം ഒരു ലക്ഷം കോടി രൂപ കടന്നു. വര്‍ഷങ്ങളായി വിദേശ മലയാളികളുടെ നിക്ഷേപം വളര്‍ന്നുകൊണ്ടിരിക്കുകയാണെന്ന്‌ ബാങ്കേഴ്‌സ്‌ സമിതിയുടെ കണക്കുകള്‍ വ്യക്തമാക്കുന്നു.

2013 മാര്‍ച്ചില്‍ 66,190 കോടി രൂപയായിരുന്ന നിക്ഷേപം 2014 മാര്‍ച്ച്‌ 31 ന്‌ 93,883 കോടിയിലെത്തി. 2015 മാര്‍ച്ചില്‍ ഇത്‌ 1,09,603 കോടിയായി ഉര്‍ന്നു. സ്‌റ്റേറ്റ്‌ ബാങ്ക്‌ ഓഫ്‌ ട്രാന്‍വന്‍കൂറിലാണ്‌ ഏറ്റവുമധികം വിദേശ മലയാളികളുടെ നിക്ഷേപമുള്ളത്‌; 26,613 കോടി രൂപ. രണ്ടാം സ്ഥാനത്തുള്ള ഫെഡറല്‍ ബാങ്കില്‍ 23,214 കോടി രൂപയുടെ നിക്ഷേപമുണ്ട്‌. ഇന്ത്യയിലെ ഏറ്റവും വലിയ പൊതുമേഖലാ ബാങ്കായ സ്‌റ്റേറ്റ്‌ ബാങ്ക്‌ ഓഫ്‌ ഇന്ത്യയില്‍ ഈ വിഭാഗത്തില്‍ 14,456 കോടി രൂപയുടെ നിക്ഷേപം മാത്രമാണുള്ളത്‌. 

കേരളത്തില്‍ 21 പൊതുമേഖലാ ബാങ്കുകളിലായി ആകെ 23,203 കോടി രൂപയുടെ വിദേശ മലയാളികളുടെ നിക്ഷേപമാണുള്ളത്‌. എസ്‌.ബി.ടി.യിലും ഫെഡറല്‍ ബാങ്കിലും പ്രത്യേകമായി ഉള്ളതിനേക്കാള്‍ കുറവാണിത്‌.

ഗള്‍ഫ്‌ രാജ്യങ്ങളില്‍ നിന്നുള്ളതാണ്‌ കേരളത്തിലെ നിക്ഷേപങ്ങളിലധികവും