ഇന്ത്യന്‍ ബാങ്കുകളുടെ റെക്കോര്‍ഡ്‌ ലാഭം സമ്പന്ന രാഷ്ട്രങ്ങള്‍ ആശ്ചര്യത്തില്‍ :
വി. ഡി. സതീശന്‍ എം. എല്‍. എ.
കൊച്ചി: ലോക രാഷ്ട്രങ്ങള്‍ ആഗോള സാമ്പത്തിക
മാന്ദ്യത്തില്‍പ്പെട്ടിരിക്കുന്ന ഇക്കാലത്ത്‌ ഇന്ത്യയിലെ ബാങ്കുകള്‍ റെക്കോര്‍ഡു
ലാഭമുണ്ടാക്കി പ്രവര്‍ത്തിക്കുന്നത്‌ സമ്പന്ന രാഷ്ട്രങ്ങള്‍ ആശ്ചര്യത്തോടെയാണ്‌
നോക്കിക്കാണുന്നതെന്ന്‌ വി. ഡി. സതീശന്‍ എം. എല്‍. എ. പറഞ്ഞു. വരാപ്പുഴയില്‍ കേരള
ഗ്രാമീണ്‍ ബാങ്കിന്റെ 575-ാമത്‌ ശാഖ ഉദ്‌ഘാടനം ചെയ്‌തു സംസാരിക്കുകയായിരുന്നു
അദ്ദേഹം. ബാങ്കിങ്ങ്‌ റെഗുലറേറ്ററി നിയമ പ്രകാരം, റിസര്‍വ്വ്‌ ബാങ്കിന്റെ
മേല്‍നോട്ടത്തില്‍, നിയമപരമായി നിയന്ത്രിക്കപ്പെട്ട ബാങ്കിങ്ങ്‌ സംവിധാനം ലോകത്ത്‌
ആദ്യമായി നടപ്പിലാക്കിയ രാജ്യമാണ്‌ ഇന്ത്യ. അതിനാലാണ്‌ സമ്പന്ന രാജ്യങ്ങളിലെ
ബാങ്കിങ്ങ്‌ ഭീമന്മാര്‍ തകര്‍ന്നപ്പോഴും, ഗ്രീസ്‌ പോലുള്ള രാജ്യങ്ങളില്‍ സമ്പത്ത്‌
വ്യവസ്ഥതന്നെ അപ്രത്യക്ഷമായപ്പോഴും ഇന്ത്യയില്‍ ബാങ്കുകള്‍ക്ക്‌ പുതിയ ശാഖകള്‍
തുറക്കുന്നതിനും കൂടുതല്‍ മെച്ചപ്പെട്ട സേവനങ്ങള്‍ ജനങ്ങള്‍ക്കു നല്‍കുന്നതിനും
സാധിക്കുന്നതെന്ന്‌ അദ്ദേഹം പറഞ്ഞു. സ്ഥലം എം. എല്‍. എ. വി. ഡി. സതീശനൊപ്പം ജില്ലാ
പഞ്ചായത്ത്‌ പ്രസിഡന്റ്‌ ആശാ സനില്‍, ആലങ്ങാട്‌ ബ്ലോക്ക്‌ പഞ്ചായത്ത്‌ പ്രസിഡന്റ്‌
വിജു ചുള്ളിക്കാട്‌, ബ്ലോക്ക്‌ പഞ്ചായത്ത്‌ മെമ്പര്‍ കെ. വി. കുഞ്ഞുമോന്‍, വരാപ്പുഴ
ഗ്രാമ പഞ്ചായത്ത്‌ പ്രസിഡന്റ്‌ കെ. എസ്‌. മുഹമ്മദ്‌, വാര്‍ഡ്‌ മെമ്പര്‍ എല്‍സമ്മ
ജോയ്‌ എന്നിവരുടെ ആദ്യ ഔദ്യോഗിക ചടങ്ങായിരുന്നു ഗ്രാമീണ്‍ ബാങ്ക്‌ ശാഖ ഉദ്‌ഘാടന
വേദി. ബാങ്ക്‌ ജനറല്‍ മാനേജര്‍ എന്‍. കെ. കൃഷ്‌ണന്‍കുട്ടി അദ്ധ്യക്ഷത വഹിച്ച
യോഗത്തില്‍ റീജിയണല്‍ മാനേജര്‍ മോഹനന്‍ എം. സ്വാഗതം പറഞ്ഞു. എ.ടി.എം.ന്റെ ഉദ്‌ഘാടനം
പഞ്ചായത്ത്‌ പ്രസിഡന്റ്‌ കെ. എസ്‌. മുഹമ്മദും, ലോക്കറിന്റെ ഉദ്‌ഘാടനം പഞ്ചായത്ത്‌
മെമ്പര്‍ എല്‍സമ്മ ജോയിയും, കിസാന്‍ കാര്‍ഡിന്റെ ഉദ്‌ഘാടനം കൃഷി ഓഫീസര്‍ ബിന്ദു സി.
എസ്സും, ഡെപ്പോസിറ്റിന്റെ ഉദ്‌ഘാടനം വ്യാപാരി വ്യവസായി ഏകോപന സമിതി ജില്ലാ
സെക്രട്ടറി പയസ്‌ എ.കെ.യും നിര്‍വ്വഹിച്ചു. ചീഫ്‌ മാനേജര്‍ കെ.പി. വാസുദേവന്‍,
സി.ഡി.എസ്‌. ചെയര്‍ പേഴ്‌സണ്‍ നിഷാ മാര്‍ട്ടിന്‍ എന്നിവരും പങ്കെടുത്തു. ബ്രാഞ്ച്‌
മാനേജര്‍ സനല്‍ സെബാസ്റ്റ്യന്‍ നന്ദിയും പറഞ്ഞു.
No comments:
Post a Comment