ഫോര്‍ഡ്‌ മസ്‌തങ്ങ്‌ ഇന്ത്യയിലെത്തി

കൊച്ചി : ഫോര്‍ഡിന്റെ ഇതിഹാസ തുല്യമായ മസ്‌തങ്ങ്‌ ഇന്ത്യന്‍ വിപണിയിലെത്തുന്നു. ഡല്‍ഹി എക്‌സ്‌ ഷോറൂം വില 65 ലക്ഷം രൂപ. സ്ലീക്‌ ഡിസൈന്‍, അതിനൂതന സാങ്കേതികവിദ്യ, ഫോര്‍ഡിന്റെ പ്രശസ്‌തമായ 5.0 ലിറ്റര്‍ വി 8 പെട്രോള്‍ എഞ്ചിന്‍, 6 സ്‌പീഡ്‌ ഓട്ടോമാറ്റിക്‌ ട്രാന്‍സ്‌മിഷന്‍, 401 പിഎസ്‌ കരുത്ത്‌ എന്നിവയാണ്‌ പ്രധാന പ്രത്യേകതകള്‍.

സുരക്ഷയ്‌ക്കാണ്‌ പ്രധാന ഊന്നല്‍. കാല്‍മുട്ട്‌ സുരക്ഷണത്തിനുള്ള നീ എയര്‍ ബാഗ്‌ അടക്കം എട്ട്‌ എയര്‍ബാഗുകള്‍ ആണുള്ളത്‌. 1964-ല്‍ പുറത്തിറങ്ങിയത്‌ മുതല്‍ ഇതുവരെ വിറ്റഴിഞ്ഞത്‌ 9 ദശലക്ഷത്തിലേറെ വാഹനങ്ങളാണ്‌. ഫോര്‍ഡ്‌ മസ്‌തങ്‌ ലോകത്തിലെ ഏറ്റവുമധികം വില്‍ക്കപ്പെടുന്ന സ്‌പോര്‍ട്‌സ്‌ കൂപ്പെ ആണ്‌. ഐഎച്ച്‌എസ്‌ ഓട്ടോമോട്ടീവില്‍ നിന്നുള്ള രജിസ്‌ട്രേഷന്‍ ഡാറ്റ പ്രകാരം 2015-ല്‍ ആഗോളതലത്തില്‍ വിറ്റഴിഞ്ഞത്‌ 110,000-ലേറെ മസ്‌തങ്‌ കൂപ്പെകളാണ്‌.

യുണൈറ്റഡ്‌ സ്റ്റേറ്റ്‌സിലെ ഫ്‌ളാറ്റ്‌ റോക്ക്‌ അസംബ്ലി പ്ലാന്റില്‍ നിന്നും കംപ്ലീറ്റ്‌ലി ബില്‍റ്റ്‌ അപ്പ്‌ യൂണിറ്റായാണ്‌ ഇന്ത്യയിലെ ഉപഭോക്താക്കള്‍ക്ക്‌ മസ്‌തങ്‌ ലഭ്യമാക്കുക.

സ്ലീക്ക്‌ ഡിസൈനിലുള്ള ഫോര്‍ഡ്‌ മസ്‌തങിന്റെ സ്റ്റാന്‍ഡേഡ്‌ സവിശേഷതകളില്‍ 19 ഇഞ്ച്‌ വീലുകള്‍, ഓട്ടോമാറ്റിക്‌ എച്ച്‌ഡി ഹെഡ്‌ലാമ്പുകള്‍, എല്‍ഇഡി ടെയില്‍ലാമ്പുക്‌, റിയര്‍ ഡിഫ്യൂസര്‍, ഡ്യുവല്‍ സോണ്‍ ക്ലൈമറ്റ്‌ കണ്‍ട്രോള്‍, 9 സ്‌പീക്കര്‍ സൗണ്ട്‌ സിസ്റ്റം, വോയിസ്‌ എനേബിള്‍ഡ്‌ സിങ്ക്‌ 2 കണക്‌ടിവിറ്റി, 8 ഇഞ്ച്‌ കളര്‍ ടച്ച്‌ സ്‌ക്രീന്‍ എന്നിവ ഉള്‍പ്പെടുന്നു.

അബ്‌സല്യൂട്ട്‌ ബ്ലാക്ക്‌, ഇന്‍ഗോട്ട്‌ സില്‍വര്‍, ഓക്‌സ്‌ഫഡ്‌ വൈറ്റ്‌, ട്രിപ്പിള്‍ യെല്ലോ ട്രൈകോട്ട്‌, മാഗ്നറ്റിക്‌, സിഗ്നേച്ചര്‍ റേസ്‌ റെഡ്‌ എന്നീ ആറ്‌ കളര്‍ ഓപ്‌ഷനുകളില്‍ മസ്‌തങ്‌ ലഭിക്കും. 

5.0 ലിറ്റര്‍ വി8 എഞ്ചിന്റെ ഏറ്റവും പുതിയ എഡിഷനാണ്‌ ഫോര്‍ഡ്‌ മസ്‌തങിലുള്ളത്‌. അപ്‌ഗ്രേഡ്‌ ചെയ്‌ത വാല്‍വ്‌ ട്രെയിനും സിലിണ്ടര്‍ ഹെഡുകളും പ്രദാനം ചെയ്യുന്നത്‌ 401 പിഎസ്‌ കരുത്ത്‌, 515 എന്‍എം ടോര്‍ക്ക്‌, മണിക്കൂറില്‍ 250 കിലോമീറ്റര്‍ കൂടിയ സ്‌പീഡ്‌. സിലിണ്ടറുകളിലേക്ക്‌ വായു കയറുന്നതും പുറത്തേക്ക്‌ വിടുന്നതുമാണ്‌ കൂടുതല്‍ കരുത്തിനും ടോര്‍ക്കിനും നിദാനം. 

പിന്നിലുള്ളത്‌ സമഗ്രമായി പരിഷ്‌കരിച്ച ഇന്റഗ്രല്‍ ലിങ്ക്‌ ഇന്‍ഡിപെന്‍ഡന്റ്‌ റിയര്‍ സസ്‌പെന്‍ഷന്‍. ഇതിന്റെ ജ്യാമിതി, സ്‌പ്രിങുകള്‍, ഡാമ്പറുകള്‍, ബുഷിങുകള്‍ എന്നിവ പ്രത്യേകമായി പരിഷ്‌കരിച്ചവയും ഉന്നതപ്രകടനത്തിന്‌ അനുയോജ്യവുമാണ്‌. പിന്നിലെ പുതിയ അലൂമിനിയം നക്കിള്‍ക്‌സ്‌, അണ്‍ സ്‌പ്രങ്‌ മാസ്‌ കുറച്ച്‌ മികച്ച റൈഡും കൈകാര്യക്ഷമതയും നല്‍കുന്നു.

ഹാര്‍ഡ്‌കോര്‍ പ്രകടനം ഇഷ്‌ടപ്പെടുന്നവര്‍ക്കായി പുതിയ ഫോര്‍ഡ്‌ മസ്‌തങില്‍ ഇലക്‌ട്രോണിക്‌ ലൈന്‍ ലോക്കുണ്ട്‌. ഓട്ടോമാറ്റിക്കായി മുന്‍ ബ്രേക്കുകള്‍ ലോക്ക്‌ ചെയ്യുകയും പിന്‍ബ്രേക്കുകള്‍ റിലീസ്‌ ചെയ്യുകയും ചെയ്യുന്നതിനാല്‍ എളുപ്പത്തില്‍ സ്‌പിന്‍ ചെയ്യാനും യഥാര്‍ത്ഥ റേസറെ പോലെ കാറോടിക്കാനും കഴിയും. 

മസ്‌തങ്‌ കേവലമൊരു കാറിനേക്കാള്‍ അധികമാണ്‌. ഫോര്‍ഡ്‌ ഉള്‍ക്കൊള്ളുന്ന സ്വാതന്ത്ര്യത്തിന്റേയും ആവേശത്തിന്റേയും ഡ്രൈവിങ്‌ ആസ്വാദനത്തിന്റേയും മകുടമാണ്‌ മസ്‌തങ്‌ എന്ന്‌ ഫോര്‍ഡ്‌ ഇന്ത്യ മാര്‍ക്കറ്റിംഗ്‌, സെയില്‍സ്‌ ആന്റ്‌ സര്‍വീസ്‌ എക്‌സിക്യൂട്ടീവ്‌ ഡയറക്‌ടര്‍ അനുരാഗ്‌ മെഹ്‌റോത്ര പറഞ്ഞു.